‘n Huiswerker het op rowers afgekom, terwyl hulle besig was om ‘n gesin van Coen Labuschagnestraat, Rensburg se TV en klanksisteem te steel.
Die rowers het omstreeks 11:00 vanoggend toegang tot die huis verkry deur eers ‘n buitehek en toe die voordeur en sekuriteitsdeur oop te breek.
Die verdagtes het in ‘n pers, ou model Volkswagen kombi weggejaag. Hulle is tot op die N3 agtervolg en later in Alberton aangekeer.
Die eienaars van ‘n Chinese restaurant in Schoemanstraat is op 1 September om 19:50 deur drie gewapende rowers oorval. Hulle het die eienaar forseer om die geldlaai oop te maak en met kontant, ‘n skootrekenaar en selfoon weggekom.
In nog ‘n voorval het polisielede daarin geslaag om ‘n verdagte wat Heidelberg die afgelope maand geteister het, op 2 September aan te keer. Die goedgeklede man het veral besighede geteiken. Hy het doodluiters in besighede ingestap en hulle met ‘n mes beroof.
