MORGENZON – Plaaslike boere het die afgelope week met trekkers, padskrapers en ander toerusting die dorp ingevaar om bome te snoei, paaie te skraap en die dorp se voorkoms te verbeter.

Daar heers ‘n nuwe gees van samewerking tussen inwoners en boere.

“Die boere en inwoners van Morgenzon is moeg gesukkel met die agteruitgang van die dorp. Hulle het besluit om self hand aan die ploeg te slaan en dinge reg te ruk,” sê Hennie Bekker, AfriForum se distrikskoördineerder vir die Hoëveld.

Hennie du Preez, wat saam met sy broer Flip die projek van stapel gestuur het, sê die gemeenskapsinisiatief wys dat inwoners nie langer wil wag vir die plaaslike owerheid nie.

Du Preez beklemtoon dat die werk nog nie klaar is nie en beoog om die projek ‘n jaarlikse instelling te maak.

Die projekte het reeds merkbare resultate gelewer en die dorp se strate getuig van die samewerking tussen inwoners en boere.

Meer besonderhede volg in die volgende uitgawe van die Hoëvelder.