CHRISSIESMEER – AfriForum se Chrissiesmeer-tak het gedurende September groot vordering gemaak met hul projekte om die dorp veiliger en netjieser te maak.

Ses nuwe ligte is by strategiese punte geïnstalleer – twee elk in Bothwell-, King Edward- en Simmerstraat – om noodsaaklike infrastruktuur te beskerm en beter sigbaarheid snags te verseker.

Volgens Millicent van den Heever, leier van die plaaslike buurtwag, is die ligprojek “noodsaaklik vir ons dorp se veiligheid en beskerming van infrastruktuur”.

Benewens die beligting het die tak ook sowat 85 000 m² gras gesny, insluitend die hele begraafplaas, en die dorp se strate skoongemaak.

“Ons fokus hard daarop om te verseker dat Chrissiesmeer netjies en aantreklik bly, veral vir besoekers,” het Van den Heever gesê.

Danksy AfriForum se asdromprojek is 79 sakke rommel gedurende September verwyder, wat die totaal vir 2025 op 389 sakke bring.

Lees meer hieroor in die gedrukte uitgawe van die Hoëvelder.