‘Tuin van iets besonders’ spruit binnekort in Ermelo
Quinita Stoltz nooi kinders en ouers om die nuwe gemeenskapsprojek in Strijdomstraat saam te help bou en versier.
ERMELO – Plaaslike inwoner Quinita Stoltz het onlangs besluit om ’n eenvoudige stuk grond in Strijdomstraat in iets besonders te verander – ’n plek van kleur, hoop en gemeenskapsgees.
Sy nooi nou die hele gemeenskap, veral kinders en hul ouers, om saam te help om hierdie droom ’n werklikheid te maak.
Die projek, wat bekend staan as die “Tuin van iets besonders”, het ten doel om die kaal lappie grond in ’n kleurryke en positiewe ruimte te omskep wat geluk en saamhorigheid uitstraal.
Die eerste stap is reeds geneem toe die terrein onlangs skoongemaak en voorberei is vir aanplantings en versierings.
Die afgelope naweek het die eerste aanplantings plaasgevind, en die area is verder skoongemaak om die tuin gereed te maak vir die volgende fase.
Vanoggend is Lucky Nkosi gesien waar hy druk besig was om die tuin verder skoon te maak.
Die groot dag breek egter eers op Saterdag,1 November om 09:00 aan, wanneer die tuin amptelik bekendgestel en vir die publiek oopgestel word.
Stoltz sê sy hoop die opening sal ’n geleentheid wees waar inwoners saam iets mooi kan skep – ’n simbool van wat moontlik is wanneer mense hande vat.
“Ek wil hê die tuin moet ’n plek wees waar almal kan bydra,” sê sy.
“Ek wil hê mense moet dit as hulle eie sien – ’n ruimte wat met tyd aanhou groei en verander soos ons dorp self.”
As deel van die voorbereiding moedig Stoltz inwoners aan om by die huis klippies te verf met woorde, patrone of kleure wat vir hulle vreugde bring. Hierdie klippies kan tydens die opening in die tuin neergesit word om mettertyd ’n kleurvolle rand te vorm.
Sy het onlangs ’n skenking van ’n klomp klippe ontvang, wat sy vooraf in die tuin sal plaas vir mense wat dalk nie klippe het om self te verf nie.
“Mense is welkom om hier ’n paar klippe te kom optel, dit kreatief te versier, en dit tydens die opening weer in die tuin neer te lê,” het sy gesê.
Sy sê daar is egter geen sperdatum nie – almal kan steeds na die bekendstelling van die tuin bydra en deel wees van die groei daarvan.
Stoltz hoop dit sal oor tyd ’n simbool van trots en saamhorigheid vir Ermelo word, ’n herinnering dat klein dade groot verskil kan maak.
Vir navrae of om betrokke te raak, kontak Stoltz by 076 368 2409.
