ERMELO – Die Annebel-projek in Ermelo, wat maandeliks noodsaaklike toiletware en sanitêre produkte aan 44 minderbevoorregte dogters voorsien, is tans onder druk weens beperkte voorraad en finansiering.

Saretha Ferns, wat die projek suksesvol bestuur en ook die plaaslike takbestuurder is, het ’n beroep op die gemeenskap gedoen om ondersteuning te bied.

Die projek word maandeliks volgehou en maak staat op skenkings en vrywillige hulp om pakkies vir die dogters saam te stel.

Volgens Ferns bestaan die huidige span uit 12 “hulpmammas” wat help om die pakkies elke maand voor te berei, maar die behoefte groei vinniger as die beskikbare hulpbronne.

Die pakkies bevat noodsaaklike items soos sjampoe, deodorant, handeroom en sanitêre produkte.

Benewens die voorsiening van produkte, word die dogters ook blootgestel aan basiese lewensvaardigheids- en higiëne-opleiding. Ferns het by ’n vorige geleentheid gesê: “Dié projek is beslis nie ’n eenvroudroom nie, maar word deur die hele gemeenskap onderhou.”

Die projek se volhoubaarheid hang sterk af van gemeenskapsbetrokkenheid, hetsy deur finansiële bydraes of deur ondersteuning as ’n Annebel-mamma.

Saretha Ferns bestuur die projek al die afgelope 15 jaar suksesvol, met verskeie dogters wat daaruit kon baat. Skenkings kan gemaak word na Annebel Ermelo, Capitec, spaarrekening 1667210473.

Vir meer inligting kan Saretha Ferns by 082 302 5335 gekontak word.

Die Annebel-projek bly daarop gefokus om nie net praktiese hulp te bied nie, maar ook waardigheid en ondersteuning aan jong meisies in die gemeenskap te versterk.