Ligbron Akademie vir Tegnologie se eerstespan het die afgelope naweek die eerstespan van Hoërskool Ermelo 35-20 kafgedraf in die halfeindronde van die Mpumalanga Grootskole-liga.

EHS het met mag en mening die eerste helfte op ’n positiewe noot begin, deur binne etlike minute die telbord te laat oorrol.

Ligbron se manne kon ’n sug van verligting slaak toe EHS se verdoelskop onsuksesvol was.

Dit was nie lank hierna nie of Ligbron het met ’n goeie stukkie aanvalswerk van hul eie, die verdediging van EHS gepenetreer gaan druk en met ’n moeilike verdoelskop geslaag.

Dit was so hittete of EHS spog bykans weer met ’n drie nadat hul losskakel, Walter Visser, met ’n parmantige steekskoppie, wat net te hard van die voet afgekom het, ’n voetresies tussen Christiaan van der Merwe en ’n Ligbron teenstander voortgesit het, die doodlyn het toe nou eindelik dié resies gewen.

Ligbron het die tempo egter hierna opgetel en met verskeie saamgevlegte aanvalsbewegings hul teenstanders onkant gevang, punte aangeteken en met ’n ferm voorsprong rustyd binnegegaan.

Die rustydtelling was 21-8 en vir EHS het daar baie opvangwerk voorgelê.

Kyk uit vir die volledige berig in die Hoëvelder in die komende weke.