Ermelo-stoeiers wen 12 medaljes tydens SA-kampioenskap
Met afrigters wat passievol raad gee en ondersteuners wat elke wedstryd meeleef, het Ermelo Stoeiklub se stoeiers hul harte uitgestoei om 12 medaljes by die SA Grieks-Romeinse kampioenskap te verower.
Die reuk van sweet in die stoeisaal, afrigters wat aanhoudend instruksies uitroep en ouers wat van die kantlyn af ondersteun, was aan die orde van die dag toe Ermelo Stoeiklub se stoeiers op 30 Mei aan die 2026 Suid-Afrikaanse Grieks-Romeinse Kampioenskap in Pretoria deelgeneem het.
Die klub het die dag met ’n totaal van 12 medaljes afgesluit nadat die stoeiers teen van die land se beste talent meegeding het by die Noord-Gauteng Stoeisaal.
Die dag het vroeg begin toe stoeiers vir die amptelike inweeg aangemeld het.
Kort daarna het deelnemers en afrigters aan die tradisionele optog deelgeneem voordat die eerste wedstryde begin het.
Vir die volgende bykans 12 ure het die matte gewemel van stoei-aksie.
Beamptes het sorgvuldig toesig gehou oor elke wedstryd, terwyl afrigters vanuit die hoeke hul stoeiers aangemoedig en taktiese raad gegee het.
Op die pawiljoene het ouers, familie en ondersteuners elke punt, greep en oorwinning intens dopgehou.
Wen of verloor, het die Ermelo-stoeiers deurgaans vasberadenheid en deursettingsvermoë getoon.
Elke wedstryd het sy eie uitdagings gebied, maar die span se voorbereiding en harde werk het vrugte afgewerp.
Die goue medaljewenners was Zion Leonard, Luke Anderson, MJ de Villiers, Kyle Breytenbach en WP Human.
David de Wet, JC de Villiers en WP Human het elk ’n silwer medalje verower.
Brons medaljes het gegaan aan Owen Jevon, Llewellyn Strydom, Gillaume Strydom en MJ de Villiers.
