Meer as ‘n honderd gaste en eregaste het die spoggeleentheid bygewoon en dertig wildsdisse geskik vir enige fynproewer is deur die lede voorberei vir aandete met koue sout kameelperdtong met soetmosterdsous, ‘n springbok- en steenbok-Kalahari-pot, gestopte blouwildebeesboud met varkspek en kruie, goud-gebraaide buffel-schnitzel, gevulde soutdeeg met bergskaapskenkel en kruie, gemarineerde soet elandribbetjies en vele meer op die spyskaart.

Louis Naudé is met die gesogte Grootkampioen Jagter van die Jaar-prys en -trofee vereer. Wallie van Dyk het tweedeplek in die afdeling gekry. Mandie Naudé ontvang ook sodoende die Weduwee van die Jaar-toekenning. Anita Smuts wen die Vrouejagter van die Jaar-trofee met Chantel Beytel in tweedeplek en Jane Toerien in derdeplek. Francois Vorster wen die Jagter van die Jaar, Binnelandse Kampioen-trofee met Maurits Meyer en JJ Naudé in tweede- en derdeplek, onderskeidelik.

Lees ook: Gravel Grinder MTB-uitdaging ‘n sukses

Christo Toerien wen die Boogjagter van die Jaar-trofee en ontvang ook die tradisionele Blaps van die Jaar-toekenning. In die Senior Parejag-afdeling wen Christo Toerien en Francois Vorster die trofee met Wallie van Dyk en Maurits Meyer in tweedeplek en Anita Smith en Armando dos Ramos in derdeplek.

CJ van Rooyen is as die Junior Lid van die Jaar aangewys en ontvang die gesogte trofee vir sy toewyding en bydrae. JJ Naudé wen die Junior Jagter van die Jaar-trofee met Ian Meyer en Carel Jacobsz in tweede- en derdeplek, onderskeidelik. Carel Jacobsz en Ian Meyer wen die Junior Parejag-trofee, met Jana en Maryna Jacobsz in tweedeplek en Ruvé Malan en Jane Toerien in derdeplek.

Erelid van die BJWV, Hansie Botha het die gasspreker, Stephen Palos, hoofuitvoerende beampte van die Konfederasie van Jagtersverenigings van Suid-Afrika (CHASA) voorgestel. Palos het die BJWV vereer en die rol van die vereniging in die stigting van CHASA geprys. Hy het ook van die uitdagings in die jag- en wildsbedryf aangespreek tydens die geleentheid.