Van Noord ag homself gelukkig dat hy die val oorleef het en nie ernstiger beserings opgedoen het nie.

Hy het op 31 Oktober aan die tweede laaste dag van die Paragliding World Cup in Bir Billing in die Himalajas (Indië) deelgeneem.

Hulle was nog tussen die berge, toe sy valskerm sowat 20m bokant die grond skielik toemaak. “’n Mens probeer maar die beste van ’n slegte saak maak en ek het my gereed gemaak vir impak.” Van Noord het die sowat 60 grade skuinste van die berg getref.

“Gelukkig is daar sowat 150 deelnemers in die kompetisie en tussen 40 en 50 ander deelnemers het gesien wat gebeur. Ek was binne 48 minute in die helikopter en oppad hospitaal toe.”

Met sy aankoms by die Fortis Memorial Hospitaal in Delhi het dokters gevind dat hy sy L2 rugwerwel gebreek het.

’n Operasie is gedoen waartydens die ballon kifoplastie tegniek uitgevoer is. Tydens die operasie word ’n ballon deur ’n naald tot in die ruggraat gedruk en opgeblaas. Dit word later uitgehaal en die holte daarvan met beensement gevul, wat dadelik die fraktuur herstel.

Van Noord het Vrydag, slegs ’n week na die ongeluk, teruggevlieg na Suid-Afrika. “Daar is nie meer probleme met die fraktuur nie, maar ek het nog probleme met my spiere.”

Hy het ’n bed gevat werk toe, “waar ek lê vir ’n uur en dan werk vir ’n uur.” Hy glo hy sal binne vier weke weer in die lug kan wees.

• Die ballon-Kifoplastie tegniek word gewoonlik gebruik vir osteoporose lyers om soepelheid te verbeter.