Elandsrivier Lodge is bekend vir sy leeus, wat in kampe om die lodge loop, wat jou snags laat dink dat jy in diepste Afrika op safari is. Om boonop nog ’n luislang te vryf sonder dat hy jou wil byt, was ’n welkome bonus.

Gerrie Gerrits, eienaar van Elandsrivier, sê dat hulle op die slang afgekom het tydens ’n wildbesigtigingsrit.

Die slang het probeer om deur die wildsheining te seil en halfpad deur die sifdraad gekom, voordat hy deur ’n elektriese draad geskok is wat hom laat besluit het om terug deur die sifdraad te probeer seil.

In die proses het hy homself soos ’n koeksister in die wildsdraad vasgewikkel.

Gaste het fluks hand bygesit terwyl mnr. Gerrits se vrou Marietjie soos ’n besorgde hoenderhen om die slang gekoek het om te kyk dat hy nie tydens die reddingsproses beseer word nie.

Hulle moes van die drade knip om die slang los te kry.

Toe was dit ’n geval van versigtig stoot en trek tot die slang ontkoek was en effe deur die weer van die elektriese skok maar sonder beserings, die langgras kon inseil.