Wilma en Mario de Jager het op Facebook gesê dat hulle nuut in Middelburg is en hul ouers, Jan en Wilma Goosen, se huis tydens die voorval opgepas het. Die Goosen egpaar is tans in Nieu-Seeland.

Op die video kan duidelik gesien word hoe twee mans die hek van sy spoor af tel. Hulle verdwyn dan vir ‘n rukkie en kom later al kruipende die erf in. Selfs as daar ’n buitelig aangaan, word hulle nie afgeskrik nie. Hulle kom egter sekondes later uitgestorm en verdwyn in die donker, vermoedelik toe ‘n tweede buitelig aangegaan het.

Die voorval het net na 02:00 plaasgevind.

Me. De Jager sê dat haar man die volgende dag agter gekom het iets skort toe hy sien die hek staan effe oop. Hy het toe na die videomateriaal gaan kyk.

Hulle het intussen hul alarm se buite sensors laat afhaal van die troeteldiervriendelike funksie sodat dit volgende keer selfs deur kruipende booswigte sal laat afgaan.

Met ‘n vorige voorval is daar twee vierwielmotorfietse gesteel toe die alarm af was omdat daar gaste by die huis was.