Mnr. en me. Frikkie (60) en Mary Oosthuizen (60) was omstreeks 05:40 vanaf Middelburg na die Wescoal Myn onderweg, waar hulle as kontrakteurs van Resource Washing werk, toe ’n kalf sowat 25 km buite Middelburg, skielik in die donker voor die bakkie inhardloop.

Me. Oosthuizen sê haar man het gelukkig nie vinnig gery nie en is hulle nie ernstig beseer nie.

“Die bees het net uit die grasse uit oor die pad gehardloop. Ons het hom nie eers gesien nie!”

Hulle het navraag gedoen oor wie die eienaar is van die bees en hom gekontak.

“Hy het vir ons gesê hy is nie hier nie, maar sal iemand stuur. Die persoon het nie eers by ons gestop nie, maar verby gery en die ander beeste net gaan terugjaag.”

Me. Oosthuizen het die boer konfronteer oor sy beeste in die pad, “maar hy wou nie erken dis sy bees nie en het ’n traak-my-nie-agtige houding gehad!”

Sy het verder uitgevaar en gesê dat sy nie kan glo “dat dit die houding is van ’n boer nie. As hy nie kan omgee vir sy medemens wat beseer is deur sy bees nie, hoe moet ons vir hóm omgee.

Ons almal bid vir die boere se veiligheid en dat hulle nie aangeval moet word nie, maar wat is hy nou beter as ’n plaasaanvaller wat ’n boer beseer het?”

Sy wou nie die boer se naam op hierdie stadium verstrek nie.