Bure het omstreeks 12:40 Dinsdag op die Zello-kanaal geroep en gesê dat daar by die mense agter hulle in Samora Machelstraat (mnr. Stoltz se huis) ingebreek word.

Mnr. Stoltz sê die lede van Hawk Sekuriteit was binne vier minute by die huis vandat die alarm afgegaan het, maar die dief het reeds weer deur die diefwering gevlug.

Die sekuriteitsmanne, asook mense in die omgewing het die booswig agterna gesit en in die proses het hy die skootrekenaar neergesmyt. Dit is onherstelbaar beskadig.

Na die inbraak het hulle gesien dat daar ook by die huis langsaan, waar mnr. Stoltz se suster, Sorina van der Walt, bly, ’n venster gebreek is. Daar is egter niks gesteel nie.

• Mnr. Stoltz wil graag die span van Hawk Sekuriteit, asook almal wat die dief probeer vang het en alarm gemaak het, van harte bedank.