Die water wat uit krane tap is vuil en ondrinkbaar en twee gesinne in Rhodeslaan, Dennesig, het nou breekpunt bereik.

Mnr. Jopie de Beer sê dit help nie om die krane te bloei nie, “want hoe langer die water tap, hoe swarter word dit”.

Sy buurvrou me. Petro Beiling, sê dat sy vroeër die week wat geblyk het om ’n wurm te wees, in haar wasbak sien dryf het.

“Ek was net té laat om ’n foto te neem voordat die insek by die drein afgesuig is,” sê me. Beiling.

Volgens die munisipaliteit was daar tot drie jaar gelede geen probleme met die woongebiede se watertoevoer nie, maar nou begin die pype bars.

Dié woongebiede het in die 70’s tot stand gekom en die waternetwerk is verouderd met kleppe wat vassit weens die feit dat daar nooit aan gewerk is nie.

Vuilgoed pak by die problematiese kleppe vas en die munisipaliteit sê dat dit moontlik die oorsaak van die toevoer na Rhodeslaan kan wees.

Deeglike aandag word die afgelope paar maande aan die probleem gegee, sê die munisipaliteit.