Maandagaand is ’n trofee koedoebul op die plaas Bospoort van mnr. Frik du Toit dood weens uitputting nadat die bok vir ’n trop honde moes vlug. Sy dogter Annelie het skote afgevuur en die honde het laat spaander maar die koedoebul was toe reeds so uitgeput, dat hy gevrek het.

Sy buurman mnr. Francois Haarhoff sê dis ’n geweldige probleem en dat hyself al drie mans met ’n trop van 20 honde aangekeer het, maar die polisie hulle nie wou aankla nie.

Gerhard Verdoorn, verbonde aan die Griffon Gifinligtingsentrum sê dis landswyd ’n probleem maar ’n pandemie in die Oos Kaap en Pongola.

Hy maan boere om nié op die jagters en hul honde te skiet nie, omdat die jagters geneig is om die boere dan te verkla vir poging tot moord.

Hy sê die honde kan wel afgemaai word, maar net in die teenwoordigheid van ’n polisielid of die parkeraad.

• Lees die volledige berig in die Middelburg Observer.