Me. Charlene Strydom (36), ’n finansiële adviseur van Euvada Financial Services, is gister uit die Steve Biko Hospitaal (Pretoria) ontslaan, nadat sy vir ’n paar dae vir ernstige bytwonde behandel is.

In ’n Facebookboodskap vertel sy hoe hartseer dit is dat haar broer se pit bulterriër, van sowat twee jaar oud wat saam met haar kinders groot geword het, haar aangeval het.

“Dit is ’n verskriklike skok, maar dit is net weer ’n waarskuwing aan mense. Ja ek weet dit is ’n pit bulterriër en dit is veghonde, maar dit kon enige hond gewees het. Jou eie hond kan jou aanval! Ek moet mense bewus maak daarvan,” het sy gewaarsku.

Sy het uitgebrei en gesê sy weet van twee onlangse voorvalle waar daar onder andere een geval was waar ’n Labrador sy eie mense aangeval het en ’n ander geval waar ’n Rottweiler een van sy huismense gebyt het.

Me. Strydom het verby die hond geloop by haar broer se huis, waarop hy haar van voor af aangeval het.

“Ek het aanvanklik gedink dit is dalk my nuwe haarverlengings wat vreemd was, maar hy ken tog my stem.” Sy sê hulle het later gesien die teef op die erf is op hitte, wat moontlik die aanval aangewakker het.

Sy vertel dat die aanval sowat 10 minute geduur het, voordat ’n buurman die hond van haar af kon wegkry deur hom met ’n graaf te slaan.

Me. Strydom is per ambulans eers na die Eugene Marais Hospitaal geneem, maar kort daarna oorgeplaas na die Steve Biko Hospitaal.

Van die wonde is met steke geheg, maar die res moes oop bly om infeksiebeheer te doen deur middel van dreineringsbuise.

Me. Strydom gaan Donderdag weer terug hospitaal toe om die wonde te laat skoonmaak en het genoem dat sy later dalk veloorplantings moet kry.

Sy noem dié voorval op Facebook: “’n onverwagte nagmerrie” wat sy nie aanvanklik met ander wou deel nie.

“Maar ek gaan, want ek wil ’n boodskap vir elk een daar buite gee. God is groot. Die duiwel het gedink hy kan wen deur op ’n wrede manier my siel te neem. Ek is God se kind en Hy sal nooit dat dit gebeur nie. Hy maak my sterk, gee my krag en beskerm my elke dag teen die bose.”
Sy het almal bedank wat vir haar bid en positiewe boodskappe stuur. “Ek voel sterk en sal ’n sterker mens hier uitstap as wat ek was.”

• Haar broer se pit bulterriër is na die Pretoria Dierebeskermingsvereniging geneem. Me. Strydom sê sy glo hulle het die dier uitgesit.

• Me. Strydom is ’n bekende gesig in Middelburg en was Februarie weer hier waar sy as finansiële adviseur werk gedoen het.