Adjudant offisier Rudi Botha het nie geskroom om die gevaarsone in te stap toe hy hoor sy suster Adri word as gyselaar aangehou tydens ’n rooftog by die Checkers op Witbank nie.

Terwyl hy die gebou ingestap het, het die koeëlreën uit ’n AK47 hom getref. Hy was meer bekommerd oor Simba se welsyn as sy eie en is eers na buite om te sien of sy hond nie getref is nie.

Dit is toe dat hy sien die bloed drup uit sy koeëlvaste baadjie.

Simba was ongedeerd, maar adjudant offisier Botha het sedert daardie dag met sy gesondheid gesukkel en hy is Sondagoggend in die Unitas Hospitaal in Pretoria oorlede.

Familielede sê toe hy by die polisie navraag doen oor vergoeding is daar aan hom gesê “gaan haal jou geld by die mense wat jou geskiet het”.

Sy oudste dogtertjie, Mardi (13) beskou haar pa tot vandag toe as haar grootste held.

Hy laat ook sy vrou Marinda en dogter Marli (9) agter.

Sy begrafnis vind Maandag 19 Junie om 11:00 uit die Volle Evangelie-Kruisgenerasie in Meyerstraat op Middelburg plaas.