CJ Uys (17) was Saterdag besig om te stroop en het oor die trekker na agter geleun om te kyk of alles nog reg werk met die stroper.

Die dryfas het sy windbreker beetgekry en dit ingetrek. CJ se klere is van hom afgeskeur en hy moes veg om nie self ook ingetrek te word nie.

Sy pa, Nico, het gesê dat hy in die proses rug-, been- en armbeserings opgedoen het. Hy het gelukkig nie enige bene gebreek nie.

Mnr. Uys het met hom na die dokter op Belfast gejaag en vandaar na die Life Midmed Hospitaal waar hy gestabiliseer en oorgeplaas is na die Life Kosmos Hospitaal. CJ is in die intensiewe eenheid opgeneem en het ook ’n operasie ondergaan.

CJ se ma, Hannatjie, het Woensdag gesê dat hy nog baie pyn verduur, maar dat die dokter tevrede is met sy vordering.

Hy is uit die intensiewe eenheid ontslaan, maar as gevolg van die risiko vir infeksies, verkies hulle dat hy nog nie besoekers ontvang nie.

“Ons is vol moed dat hy sommer gou beter sal wees”.