Kliniese sielkundige, skrywer en motiveringspreker, dr. Henning Gericke, is van mening dat mense wat fopnuus opmaak en dit versprei, nie hul eie probleme in die gesig wil staar nie en dan stories opmaak om belangrik te probeer voel.
Dié vraag aan dr. Gericke volg nadat ’n vrou, Marthie van der Merwe, die afgelope twee weke ’n verhaal op Facebook versprei het oor ’n “Vrou langs die pad” en sommer ’n ou foto gesteel het vanaf www.mobserver.co.za se argiewe.
Haar storie het egter niks uit te waai gehad met die foto nie.
Mense het aangeneem die vals storie en die foto is verbind aanmekaar.
Wat ongelooflik is, is dat mense nie wil erken dat dit net ’n liegstorie is nie. “Dit bly ’n inspirerende storie,” word gekeer.
Daar word steeds geglo dat die verhaal van ’n vrou wat langs die pad gekry is en later in ’n motorwrak “verskyn”, die waarheid is.
Dr. Gericke sê persone wat hierdie tipe stories opmaak, leef in hul eie wêreld en is dit vir hulle ’n ontvlugting van hul eie realiteit.
“As jy so iets versprei maak dit jou skielik kragtig en is dit ’n grootheidswaan, dit maak jou belangriker as wat jy is.”
Hy sê hierdie mense het ’n swak selfbeeld en het probleme met onsekerheid en die hantering van konflik.
“Hulle leef in ontkenning en hulle glo selfs hulself as hulle die onwaarhede versprei. Hul eie probleme is só groot dat hulle nie die realiteit kan hanteer nie en is dit ’n manier om weg te kom daarvan.” Dr. Gericke sê dit is egter “ongesond en siek.”
Die afgelope week is dit ook vir die waarheid versprei dat Oscar Pistorius selfmoord gepleeg het en die Britse akteur, Rowan Atkinson, Mr Bean, in ’n motorongeluk gesterf het.
Die berig dat president Zuma R2 miljard aangebied is om die pad te vat is ook glo fopnuus.
Lesers sal tereg nou vra: Wat moet ek nou glo? Wat is die waarheid en wat is net liegstories of soos dit sagkens gestel word, fopnuus.
•Dr Gericke was vir jare ’n inwoner op Middelburg, het al ’n boek gepubliseer, het verskeie Suid-Afrikaanse rekords in die middelafstande gehou, was by die Bokke betrokke toe hulle die Wêreldbeker gewen het en was tot onlangs by die Stormers betrokke.
