Motordiefstal-sindikaat aan die woeker in omgewing
Twee dubbelkajuit bakkies wat in een week by twee verskillende motorhandelaars gesteel is, dui op ’n moontlike sindikaat, met ’n voorliefde vir die tipe voertuie, wat tans in die omgewing werksaam is.
’n Man het Maandagoggend by ’n motorhandelaar in Middelburg ingestap, ’n dubbelkajuit Toyota bakkie opgemaak, ingeklim en weggery.
Daar word vermoed dat hy moontlik ’n spaarsleutel laat maak het omdat beide sleutels nog by die motorhandelaar is. Die bakkie is steeds soek.
Donderdagmiddag het nog ’n Middelburgse sakeman deurgeloop toe daar ’n Ford Ranger dubbelkajuit by die eMalahleni tak van sy motorhandelaar gesteel is.
Die diefstal is voorafgeloop deur ’n man in ’n splinternuwe Mercedes wat by die handelaar gestop en gevra het om die badkamer te gebruik.
Hy het oppad terug ’n sleutel van ’n lessenaar af gevat en eers ’n rukkie op die vloer tussen die motors vertoef voordat hy gery het.
Die sleutel is oomblikke te vore deur ’n verkoopsverteenwoordiger wat iemand op ’n toetsrit geneem het, daar neergesit.
Lees verwante nuus hier:
Sowat 45 minute later het ’n ander man by die motorhandelaar ingestap, in die bakkie geklim en daarmee weggery.
Dit is egter nie die eerste keer wat die motorhandelaar onder diewe deurloop nie en daar word sedert ’n kaping verlede jaar, Cartrack sisteme in al die voertuie op die vloer gesit.
Die bakkie is net na 18:00 in Dennilton by ’n sinkhuis teruggevind.
