Me. Janine Olivier (van die “Reason to Believe” organisasie) sê sy vat elke dag vir hulle brood, “dat hulle net iets te ete het. Dit is al wat ek op hierdie stadium vir hulle kan gee.”

’n Paar van hulle was deel van die hawelose groep, wat eers by die Kees Taljaard Stadion en later na ’n plek van veiligheid geskuif het.
Van hulle het gekla en gesê dit is “soos ’n tronk”.

Me. Rehana Pilodia (voorsitter van die Middelburg Gemeenskapspolisiëringsforum) sê sy weet van die paar haweloses wat weggeloop het.

“Hulle het pille gevat, fyn gekou en dan gemaak of daar skuim by hul monde uitkom, om kliniek of hospitaal toe te kan gaan, om weg te loop.”
Sy sê die meeste is dwelmverslaafdes, wat terug strate toe is vir hul dwelmgewoontes.

“Hulle mag egter nie in die strate in hierdie tyd van die grendelstaat rondbeweeg nie.”

Me. Olivier sê sy wéét van die mense by die “Pienk Huis”, waar daar geen krag of waterfasiliteite is nie, is óf dwelm, óf drankverslaafdes. Sy en haar verloofde, Wynand Blignaut, kyk egter verby hul verslawings en sien net mense wat honger is.

“Dit bly mense, mense wat kos nodig het. Hoekom word daar van hulle vergeet in hierdie tyd?”