Tonteldoos roofverdagtes later voor
Die hofsaak teen vier mans, wat deur die staat beskuldig word dat hulle in 2017 by ’n rooftog en inbraak op twee plase in die Tonteldoos omgewing betrokke was, is hierdie week weer uitgestel.
Lendi Raphalalani Modileng (28) van Plot 10 Modderspruit, Kabelo Petrus Makua (29) van Phokane in Mokgapaneng, Stimpie Ber Makua (21) van die plaas Phokwane in Stoffberg en Tshepo Makua (30) van Nebo se verhoor het in Augustus 2019 reeds begin maar is skielik uitgestel toe Modileng aangedui het dat hy sy regshulpraad prokureur se mandaat wil beëindig.
Die verhoor is nog ’n keer vertraag as gevolg van die Covid-19 inperking en is eers in September hierdie jaar hervat. Dit moes in September weereens uitgestel word as gevolg van beurtkrag wat hofverrigtinge onderbreek het en is toe weer in Oktober op die Middelburg Streekshofrol geplaas.
Met die Oktober hofverrigtinge het die ander beskuldigdes skielik aangedui dat hulle nie meer hul regshulpprokureur vertrou nie en haar mandaat wil beëindig. Die saak is toe tot Dinsdag 1 Desember uitgestel vir die aanstelling van nuwe regshulp.
Modileng en sy drie medebeskulidgdes word aangekla van roof met verswarende omstandighede, die onwettige besit van vuurwapens en ammunisie en huisbraak.
