Negejarige verloor bewussyn na hy in mangat val
’n Negejarige seuntjie het skraapwonde opgedoen en sy bewussyn vir ’n rukkie verloor, nadat hy in ’n mangat op ’n sypaadjie geval het.
“Ons leer altyd ons kinders om op die sypaadjie te loop uit die pad van die verkeer, maar nou het my kind in ’n gat geval op die sypaadjie! Ons wil nie eers meer gaan stap nie,” het me. Angelique Boshoff vanoggend gesê.
Die familie, wat bestaan uit mnr. en me. Melgie en Angelique Boshoff en hul kinders Edmund (11), Melcolm (9) en Adriaan (2) het op 4 April teen skemerdonker in Skuinsstraat (Hendrina) gaan stap.
“Ons as gesin gaan stap gereeld,” vertel sy.
“Die volgende oomblik het Melcolm gegil, maar ons kon hom nie sien nie! Edmund het geskree: ‘hier is hy, hy het in ’n gat geval!”
Me. Boshoff sê sy was besig om hom te troos, toe hy skielik vir haar sê: “Mamma, ek kry nie asem nie!” en hy het voor haar “pap” geword.
Mnr. Boshoff het hom by haar gevat, sy armpies in die lug gehou en sy ruggie gevryf.
“Hy wou nie bykom nie en my man moes op sy borsie begin druk. Ek het hom gevat, op sy sy neergelê en sy rug gevryf, waarop hy histeries bygekom het.”
Hulle het hom opgetel en is vinnig met hom huistoe om te kyk of hy seergekry het.
“Sy bors en ribbes was seer met die impak toe hy vasgegryp het en hy het ’n stukkende plek op sy been gehad wat ons skoongemaak het.”
Hulle is daarna na die polisie toe om hulle van die gevaarlike gat te vertel.
“Toe ons later die aand weer daar verby ry, het ons gesien daar staan dronk mense naby die gat en het ons weer die polisie daarvan verwittig.”
Hulle het die Steve Tshwete Munisipaliteit ook in kennis gestel die volgende oggend, wat later verlede week die gat met konkruit geseël het.
Me. Boshoff was hewig ontsteld oor die gebeure.
“Die seerplekkies wat Melcolm opgedoen het, is nie erg nie, maar hy het opgehou asemhaal. Wat as ons hom nie kon bykry nie? Ons kan net dankie sê dat God hom opgepas het.”
