Vrou veg vir lewe teen aanvaller met mes
’n Vrou vertel hoe sy vir haar lewe geveg teen ’n aanvaller wat haar met ’n mes gesteek het.
Anke Strydom (39), is erg getraumatiseer deur die gebeure wat plaasgevind het op hul plot op Sundra. Hulle bly die afgelope ses jaar daar.
“Hy het sy hand opgelig om my met die mes te steek, waarop ek met my linkerarm gekeer en hy my dwarsdeur die arm gesteek het met die mes.”
Anke herleef oomblik vir oomblik weer die gebeure van Dinsdagoggend.
“Ek was ekstra paraat want ek het ’n e-pos oor die naweek ontvang van hom af waarin hy vir my vertel het dat hy in ons huis was en my e-posadres op my skootrekenaar gekry het. Hy het daarin gesê presies wat ek elke dag doen.”
Sy en haar man, Gerrit (oud-leelring van HTS Middelburg) het nadat hulle dit ontvang het, dit aangemeld by die polisie.
Haar ma, wat net ’n entjie van hulle af op die plot bly, was Dinsdagoggend by haar en haar gevra om weer die deur te sluit.
Anke het omstreeks 10:00 die deur effens oopgemaak sodat die klein hondjies kan inkom.
Dieselfde oomblik het die booswig die deur oopgestamp en bo-op haar gespring.
Sy onthou dat hy blou sjirurgiese handskoene aangehad het, want hy het haar die hele tyd met die vuis in die gesig geslaan, terwyl hy bo-op haar gesit het.
Hy het vir haar geskree: “don’t fight!” en met die een hand op die grond vasgedruk en met die ander hand met die vuis geslaan.
Met bomenslike krag het sy aangehou veg en hom met die knie gestamp, waarop sy kon opspring. Hy het haar egter teruggeruk en met die mes probeer steek. Toe sy instinktief met haar linkerarm keer, het hy haar dwarsdeur haar voorarm gesteek.
Sy het losgeruk en na die hoofslaapkamer gestorm, waar sy teen haar seun se bed op die grond gaan sit het, met haar voete teen die deur gedruk. Haar aanvaller het die hele tyd teen die deur gestamp.
Terwyl sy so gesit het, het sy ’n vuurwapen teen die muur sien staan en hom gegryp. Die oomblik toe die booswig deur die deur storm, het sy die wapen in sy gesig gedruk en geskree: “I will shoot you.”
Dit het hom ontsenu en het hy omgespring en weggehardloop.
“Hy het vir my gekom, want my handsak het by die deur gestaan en hy kon hom net gevat het. Hy wou kom om my dood te maak.”
Anke het per radio die buurtwag ontbied en haar ma het haar hoor skree.
Hulle het met haar na ’n hospitaal in Springs gejaag, waar haar wonde met steke geheg is.
’n Poging tot moord saak is by die Sundra polisie geopen.
• Bure se tuinier het later dieselfde dag gesê dat hy ’n onbekende persoon die afgelope tyd op ’n gedeelte van die plot, wat hulle nie gebruik het nie, sien rondloop het.
• Die aanvaller is steeds op vrye voet.
• Gerrit is die seun van bekende Middelburger, Naas Strydom.
