‘Moerse’ borde by ‘moerse’ slaggate
’n Vrou wie se 22-jarige dogter gesterf het in ’n motorfietsongeluk naby die erge slaggate tussen Belfast en Dullstroom, is dankbaar dat daar nou oral groot borde op is.
Die Dullstroom Boerevereniging het hul moue opgerol en borde en vlaggies oral in die area opgesit, nadat daar die afgelope jaar talle ongelukke was.
“Die ma van die dogter wat in ’n motorfietsongeluk was, het ons gebel en dankie gesê vir wat ons probeer doen. Sy het gesê dit sal nie haar dogter terugbring nie, ‘maar dit sal darem keer dat daar nie nog mense op die pad sterf nie,” het ’n lid van die bestuur van Dullstroom Boerevereniging (wat anoniem wil bly) vanoggend gesê. 
Krysten Butcher het op 1 Maart in die ongeluk, wat tussen Belfast en Dullstroom gebeur het, gesterf.
Haar vriend, Ollie (Evert) Coetzee, het die onderste deel van sy been verloor in die ongeluk en is steeds in die Witbank Hospitaal, waar hy vir ernstige beserings behandel word. Twee dae nadat hy in die hospitaal opgeneem is, is die res van die been, net onderkant die heup, geamputeer.
’n Maand later, sowat twee weke gelede, het ’n voertuig uitgeswaai vir ’n slaggat, beheer verloor en het die voertuig gerol.
Motoriste wat die pad daagliks gebruik, sê dat daar daagliks voertuie langs die pad staan om bande te ruil, wat beskadig word deur die gate in die pad.
• Die lede van die Dullstroom Boerevereniging het waarskuwingsborde by die provinsiale Departement van Paaie en Vervoer gaan haal en self opgesit om mense te waarsku om versigtig te ry.
Hulle het ook by die “Slaggat” gevaarborde, die woorde ‘moerse’ aangebring en op die teeroppervlakte self die woorde “Slow” geverf.
Verder het een van die lede ’n goudgeel reënjas opgesny om ook vlaggies langs die pad aan te bring. 
“Ons het dit kort voor die Paasnaweek gedoen en het dadelik ’n verskil opgemerk op die pad. Daar is egter steeds mense wat alles ignoreer en op die pad jaag en dan skade aan hul voertuie opdoen.”
• Kort voor hulle die borde opgesit het, het hulle opgemerk dat daar werkers is wat besig is om sand in die gate te gooi.
“Dit help niks, want dit is nie eers vasgeslaan nie en met die eerste reëns spoel dit eenvoudig net weg.”
