‘Die brandlelie blom weer’
Die vorige eienaar van Clubville Apteek, Susan Potgieter, het ’n brief van bemoediging aan die huidige eienaars en personeel van die apteek geskryf.
Susan Potgieter
Terwyl ek voor die afgebrande Clubville apteek staan, gaan my gedagtes terug ongeveer 30 jaar.
Ons tender om die “Dispensary Apteek” langs die “Jode Dokters Praktyk, Patz en Vennote” oop te maak is aanvaar en so het Clubville Apteek die lig gesien.
Ons wou ’n ander soort apteek gehad het. ’n Apteek waar ’n mens maar ’n mens kon wees. Waar ons saam met ons kliënte/pasiënte kon gesels, eet en koffie drink, maar waar hulle tog professionele diens en raad kon kry.
Clubville Apteek was nog altyd daardie soort plek waar oud en jonk, verskillende tale en nasionaliteite, persoonlik met diens bedien is.
Clubville Apteek het ook groeipyne beleef, die druk van groter wordende groepe waar druk van alle kante beleef, ervaar is, maar die belofte was altyd daar.
“For in time of trouble, He shall hide me in His pavilion in the secret of His tabernacle shall He hide me, He shall put me upon a rock.”
Dit was so. Clubville Apteek was eenkant, amper weggesteek, maar ’n plekkie waar mense, mens kon wees.
Ons het Clubville Apteek in 2016 aan twee entoesiastiese jong aptekers verkoop. Jacqui Clapton met ’n Meestersgraad in Farmasie Praktyk en Hannes Clapton met ’n Meestersgraad in Farmakologie en ’n MBA, twee baie bekwame mense.
Hannes en Jacqui het Clubville Apteek werklik na nuwe horisonne geneem, na hoër hoogtes.
Hulle is altyd gretig om te leer en toe te pas wat hulle by ons ouer garde kon leer en saam met hulle kennis kon toepas.
Ons wil baie dankie sê aan al die kliënte wat Clubville Apteek vir baie jare ondersteun en bygestaan het. Julle het ons goed behandel en saam-saam het ons mekaar as vriende geslyp.
Aan almal wat nuut is by Clubville Apteek, wil ons sê ons vertrou dat julle nog saam met Hannes en Jacqui en hul personeel baie jare diens gaan geniet.
Hul bekwame span bestaan uit Charné en Annalie (langste daar), Gerda en Sulita (ook meer as 10 jaar daar), Reghard (meer as drie jaar), Anri (twee jaar) en Sera en Salomie (baie jare diens).
Na ’n brand op ’n plaas buite George, stap die eienares deur die swartgebrande veld en sy sien oral hoe ‘brandlelies’ hulle verskyning gemaak het na die verwoestende brand.
“Fire lilies represent love and passion.”
Clubville Apteek, die brandlelies blom weer. Laat jul liefde en passievolle lewens steeds liefde en passie in jul kliënte wek.
• Die Clubville Apteek het Maandagaand afgebrand, maar Dinsdag was die personeel reeds weer op hul pos onder ’n gazebo voor die apteek om pasiënte en kliënte te help.
• ’n Volledige berig verskyn in die Vrydag uitgawe van die Middelburg Observer. 
