Professionele renosterstropers slaan toe by Ubhetyan
Die stropers wat ’n renosterbul by uBhetyan geskiet het vir sy stukkie horing wat weer uitgegroei het, het dit beslis al voorheen gedoen.
“Hulle het nie gekom met pangas en die horing afgekap nie. Hulle het dit afgesny. Hulle het dit dus al voorheen gedoen,” het mnr. Deon Cornelius (eienaar Ubhetyan) vanoggend gesê.
Hy was gister in die dorp (Middelburg) toe werknemers hom laat weet dat hulle die dier se karkas gekry het en hy en sy vrou, Susan, het plaas toe gejaag.
Met nadere ondersoek het hulle gevind dat die dier drie keer geskiet is. Een keer in die bout, wat regdeur gegaan het en onder by die pens uit is. Die ander skoot is deur sy nek en het sy rug afgeskiet. Die derde skoot was in die kop.
“Ek glo hulle het hom van agter af geskiet en toe hy val, die doodskoot in die kop gegee.”
Dit is baie ruig waar die renoster geskiet is en daar is geen spore gekry nie. Hulle het wel ’n fragment van ’n .375 jaggeweer patroon gevind.
Lees ook: Renoster by Ubhetyan afgemaai
Mnr. Cornelius het die hulp van die privaat Genesis K9-groep ingeroep om met een van hul honde te kyk of hulle nie nog patroondoppies kan kry nie.
Die hond kon egter niks vind nie en die vermoede bestaan dat die booswigte dit opgetel het.
Hy sê dat hulle al hul lyndrade nagegaan het, maar dat daar nêrens drade geknip is nie.
“Hulle kon nie van die ander kant af gekom het nie, want daar is net kranse. Ons vermoed hulle het by die hekke ingekom!”
• Die renoster is sowat vier kilometer vanaf die lodge in die bosse geskiet.
• Na aanleiding van die maaiers op die dier, is dit duidelik dat die dier ten minste al Saterdagmiddag of -aand geskiet is. Hy weet die renoster, genaamd Ubhet, is beslis nie voor dit geskiet nie, want hy het hom nog Saterdag omstreeks 02:00 gesien toe hulle patrollie gery het.
Mnr. Cornelius het Sondag al begin bekommerd raak toe hy net die koei en kalf, wat gewoonlik saam met Ubhet rondloop, alleen in die veld gesien het.
• Daar is vroeër vandag ’n lykskouing op die karkas gedoen vir die ondersoek.
