Hoof net verkouerig, toets positief vir Covid-19
Die hoof van Laerskool Middelburg en sy hele gesin is tans in isolasie, nadat hy gister die uitslag gekry het dat sy Covid-19 toets positief is.
“Ek kan dit nie glo nie. Ek was net Saterdag effens verkouerig, maar tot nou toe nog was ek nie siek nie.”
Hy het egter Dinsdag besluit om te gaan toets vir die virus “net om voorkomend op te tree,” sê mnr. Gerrie van der Merwe.
Dit is duidelik dat hy geskok was toe die uitslag Woensdag positief was.
Mnr. Van der Merwe sê hy is een van die persone wat tot op die boek die protokol by die huis en skool volg ten opsigte van die pandemie en is dit hoekom hy so verras is, omdat hy die virus gekry het.
“Ek dra altyd my masker, was en saniteer omtrent 100 keer op ’n dag my hande. Ek het géén idee waar ek dit kon opgedoen het nie.”
As hy moet teruggaan op sy spore, kon dit letterlik “enige plek” gewees het. Soos almal daarbuite, was hy net in winkelsentrums, tuis en by die skool.
Hy het gemeld dat nog ’n personeellid van die skool positief getoets het vir die virus vroeër hierdie week. Hy wil nie namens die personeellid praat nie en het net gemeld dat die persoon en hul hele gesin ook in isolasie is.
• Die skool volg steeds die standaard Covid-19 regulasies om op ’n daaglikse basis die skool te saniteer en is daar geen rede tot kommer vir leerlinge of ander personeellede nie.
• Hy het dankie gesê vir sy personeel wat die fort hou by die skool terwyl hy tans in isolasie is.
• Vroeg in April het die hoof van Belfast Akademie, mnr. Fanie Barendze, die skool gesluit vir vier dae, nadat hy, sy vrou, twee personeellede en twee werkers positief vir die virus getoets het. In hierdie tydperk het hulle die hele skool behoorlik ontsmet.
• Die bestuurder van die SAVF Tehuis, mnr. Nico Swart en sy hele gesin het drie weke gelede positief vir die virus getoets en was hulle ook almal in isolasie. Nie een van hulle was gelukkig baie ernstig siek nie.
