Na ’n string hondevergiftigings en die diefstal van ’n Yamaha vierwiel in Steve Bikostraat, is ’n groep van vier mans weer op videomateriaal vasgevang, wat Maandag net na 03:00 rondgesluip het in Steve Bikostraat en vanoggend net na 02:00 in Manie Maritzstraat.
In die videomateriaal van Maandag, kan daar gesien word hoe ’n hond die groep afskrik.
Vanoggend het hulle die aftog geblaas toe mnr. Mario Botha se alarm afgegaan het toe een van hulle oor die muur klim.
Hy en sy vriendin, Meisiekind van Niekerk, het wakker geword toe die alarm afgaan. Hulle het dadelik op die kameras gekyk en gesien hoe die een booswig weer uitspring uit die erf uit. Nadat hulle al die videomateriaal nagegaan het, het hulle gesien dat dit ’n groep van vier is wat na hul erf gesluip het.
Terwyl die een oor die muur klim, kon ’n mens duidelik die wielsleutel in sy hand sien. Dit laat die vermoede bestaan dat hulle agter die wiele aan was van die paartjie se bakkies wat onder die afdak staan.
“Dit is helder verlig, maar dit skrik hulle nie af nie. Op ’n stadium sien jy dat sy makker vir hom na die kamera beduie en trek hy net sy hoed laer oor sy oë,” sê mnr. Botha.
Die oomblik toe die alarm afgaan, het die booswig net weer uitgeklouter uit die erf uit en doodluiters saam met sy vriende weggeloop.
“Hulle het nie eers gehardloop nie!”
•Na die string voorvalle, is ’n veiligheidsgroep gestig om inwoners meer paraat te maak.
Die vermoede bestaan dat dit die selfde groep is wat twee weke terug honde vergiftig het, drie dae voordat hulle mnr. Marius Jordaan se Yamaha Raptor gesteel het.
•Inwoners word ook geteister deur ’n groep dwelmverslaafdes wat heeldag loop en bedel. Dit kan dalk dieselfde groep wees wat vir die misdade verantwoordelik is.
•Mnr. Botha se rooi Mustang is in September 2018 by dieselfde adres gesteel. Die voertuig is kort daarna by die Mamelodi Polisiestasie gevind.
Met die assessor se aankoms by die polisiestasie om die voertuig uit te ken, was die voertuig egter wéér gesteel én die dossier skoonveld. Hulle het die voertuig nooit weer gesien nie.
