Ubhetyan se renosterkoei ook gekwes
Net etlike dae nadat Ubhet, die prag renosterbul van uBhetyan O Africa afgemaai is vir die stukkie van horing wat weer gegroei het, is daar gister gevind dat hul renosterkoei ook gekwes is.
Mnr. Deon Cornelius (eienaar, uBhetyan) sê hulle het al die renosters deurgegaan vir beserings nadat Ubhet verlede Dinsdag in die veld gekry is.
Hulle het egter nie die gat aan die kant van die renosterkoei, Behati, se blad gesien nie.
Ubhet is drie keer geskiet, een keer in die bout, wat regdeur is en onder deur die pens uit is, in die nek, waar sy rug afgeskiet is en in die kop.
Die stropers het die stukkie horings, wat gegroei het nadat dit ’n paar jaar gelede verwyder is, afgesny en nie afgekap nie. Lees ook: Professionele renosterstropers slaan toe by Ubhetyan
Na die stroping van Ubhet het hulle die kamp deurgegaan om te kyk of al die renosters reg is en het alles reg gelyk.
Gistermiddag tydens ’n patrollie het mnr. Cornelius gesien daar loop bloed teen Behati se sy af. By nadere ondersoek het hy gesien dat sy gekwes is.
“Ons vermoed haar hart en longe is net gemis, maar sal presies weet hoe ernstig die beserings is nadat ons haar gepyl het en haar kan ondersoek.” Die ondersoek sal vandag gedoen word. Lees ook: Renoster by Ubhetyan afgemaai
• Ubhet was sowat 15 jaar oud.
• Behati is ’n Afrika naam wat “geseënd” beteken: “sy wat geluk bring.”
Ronel Brooks het destyds die naamkompetisie gewen om vir die renosterkoei ’n naam te gee.
