Wielstelers op heterdaad betrap
Twee wielstelers is vanoggend in Seringstraat (Kanonkop, Middelburg) op heterdaad betrap deur ’n buurman, maar hulle het laat spaander voor hulle gearresteer kon word.
Me. Martie Jacobs sê sy het vanoggend om 04:04 wakker geskrik van ’n geweldige getoeter buite hul erf. Sy het haar man, Marius, wakker gemaak en hulle het in die gang afgehardloop.
“Toe ek by die kombuisvenster uitkyk, het ek die mense by die hek gesien wat die toeter geblaas het.”
Buite was van die wiele afgehaal, en ’n gedeelte van die voertuig het reeds op plaveiselstene gestaan.
Me. Jacobs sê dat hul buurman in die oggende om 04:00 opgelaai word om te gaan werk. Die oomblik toe die voertuig hom oplaai, het hy en die persone by hom die twee booswigte in die Jacobse se erf gesien. Een het aan die buitekant gestaan en die ander een was nog in die erf om die wiele aan te gee.
Die mans het dadelik die toeter begin blaas om almal wakker te maak en die booswigte agterna probeer sit. Die wielstelers het egter oor Springbokstraat, in die Stoffbergpad se rigting gevlug en die veld in verdwyn.
Me. Jacobs sê wat hulle dronkslaan, is die dat die boewe nie van hulle plaveiselstene gebruik het nie, maar daar aangekom het met hul eie plaveiselstene. Die diewe het ook hul domkrag net daar gelos toe hulle weggehardloop het.
Dit is duidelik dat die diewe die wiele agter ’n boom met blare en takke wou toegemaak het, voor hulle uitgevang is.
Net die twee is gesien en die vermoede bestaan dat die een buite gestaan het as uitkyk en sodat sy makker vir hom die wiele oor die muur kon aangee.
• Die Jacobs gesin bedank die mans wat opgetree het, sodat die boewe nie kon wegkom met hul wiele nie.
• Die afgelope paar nagte is daar op verskillende noodgroepe gemeld dat gure karakters rondsluip. Daar is onder andere hulp gevra waar betreders in erwe ingespring het en by ’n ander huis was wielmoere van wiele reeds losgedraai.
• Verlede week is daar ook ’n hond in Koedoestraat vergiftig.
