Vrou twee keer slagoffer van misdaad
’n Rower het gistermiddag ’n vrou in die gesig geklap in die parkeerarea naby die Tosca Sentrum.
“Hy het sy hand deur die venster gedruk en my geklap!” het me. Vanessa de Bruin ontsteld gesê.
Sy het kort na 16:00 na die sentrum gery en opgemerk dat daar nie parkering is reg voor die gebou nie. Sy moes in die groter parkering, etlike treë weg van die sentrum af, parkeer.
Me. De Bruin sê dat sy opgemerk het dat haar voertuig sukkel om te sluit en sy het vinnig na die winkel gestap wat seep verkoop. Voordat sy nog by die winkel kon ingaan, het ’n vrou na haar toe gekom en gesê daar is mense in haar kar.
“Gelukkig hou ek niks van waarde in my kar nie en ek het my handsak by my gehad.”
Me. De Bruin het omgevlieg en vinnig na haar voertuig geloop, maar kon niemand sien nie. Haar voertuig was egter nie gesluit nie en sy het ingespring en dadelik gesluit.
Sy het haar venster effens oopgemaak vir vars lug en het net te laat die hand gesien wat deur die effense opening kom.
“Ek het só groot geskrik dat ek in plaas van om die elektroniese venster toe te druk, die venster per ongeluk groter oopgemaak het.”
Die volgende oomblik het ’n man haar vol in die gesig geklap. In die daaropvolgende gebeure het sy sy hand probeer uitdruk en dadelik weggetrek.
In haar truspieëltjie het sy gesien dat die booswig sy ewewig verloor en neergeslaan het. Sy het van skok nie verder notisie geneem nie en tot by haar huis gery.
Me. De Bruin het aangedui dat sy die voorval by die polisie gaan aanmeld.
•Dit is die tweede keer binne ’n week dat me. De Bruin die slagoffer is van misdaad.
Sondag tussen 09:00-10:00, toe sy vir die uur nie tuis was nie, het diewe oor die palissade heining van haar huis in Springbokstraat (Kanonkop) geklim en al haar buiteligte en die ligte se kabels gesteel.
