Covid eis geliefde Sandra
Die bekende eienaar van Bezuidenhout Loodgieters op Middelburg, me.Sandra Bezuidenhout (62), is vanoggend in die Netcare Cuyler Hospitaal in Uitenhage oorlede.
“Ons het die mooiste foto van haar met haar hande uitgestrek na Bo, wat geneem is toe sy nou in die Kaap was. Dit beskryf my ma. ’n Godgewende vrou!” het haar dogter, Cherise, hartseer gesê.
Me. Bezuidenhout is ’n paar weke gelede na die Kaap waar sy eers saam met ’n vriendin haar 60ste verjaardag gevier het. Vandaar het sy by haar niggie in die Wes Kaap gaan kuier.
Sy het skielik siek geword en is verlede week in die Cuyler Hospitaal opgeneem. Sy het positief vir die Covid-19 virus getoets.
“Hulle kon haar nie op die normale ventilator sit nie, omdat haar bloed so gestol het. Sy is net op ’n gewone asemhalingsmasjien gesit.”
’n Suster van die hospitaal het die kinders gister laat weet dat dit nie goed gaan met haar nie en het hulle almal deurgevlieg.
“Die hospitaal was fantasties. Hulle het toegelaat dat ons laasnag tot na 01:00 by haar bly.”
Kort na 05:00 vanoggend is hulle laat weet dat hulle moet kom, dit gaan nie goed nie.
“Toe ons by die hospitaal inkom, het hulle vir ons gesê sy is pas oorlede. Ons was twee minute te laat.”
Middelburgers sal dié sakevrou onthou wat altyd geveg het vir reg en geregtigheid.
Sy het ook die Bethesda, Huis van Hoop skool begin en was tot met haar dood by die skool betrokke.
“My ma was ’n ystervrou, ’n dinamiese mens wat soveel vir ander gedoen het. Sy was só erg oor haar kleinkinders. Sy kan nou gaan rus by my pa.” (mnr. Christo Bezuidenhout is op 21 September 2014 oorlede).
Me. Bezuidenhout was ook vir jare aktief betrokke by die Hervormde Noord gemeente.
Sy word oorleef deur haar kinders, Cherise, Liezel, Chrizan en Vileyne en skoonkinders Christo en Anton.
Begrafnisreëlings sal later op www.mobserver.co.za. bekend gemaak word.
