Plaaslike inwoner, dr. Kobus Terblanché, wat daagliks met sy honde langs die Klein Olifantsrivier stap, is ’n kampvegter vir die rivier se behoud, nie net om besoedeling hok te slaan nie, maar ook om die rivier en sy oewers as een van Middelburg se grootste trekpleisters te onderhou.

Hy het in April ’n werkbare voorstel by die munisipaliteit ingedien, maar tot hede nog niks van hulle oor die voorgestelde plan gehoor nie. In die brief aan die munisipaliteit, stel dr. Terblanché, wat sê dat die rivier een van die dorp se “beste bates is,” voor dat die plaaslike brandweer verantwoordelikheid vat vir die onderhoud en instandhouding van die openbare areas rondom die rivier van die Lilian Ngoyistraat-brug tot by die Walter Sisulustraat-brug.

Hy meen dat dit die area op die voorstoep van die brandweer is en dat die munisipaliteit die brandweer moet toerus om die gedeelte te onderhou. Dr. Terblanché sê dat dit ’n “prestige projek” vir die brandweer kan word en dat groot borde met die brandweer se kredo, en hul spesifieke betrokkenheid by die projek,

aangebring kan word. Volgens dr. Terblanché sal die voorbeeld wat die brandweer stel, inwoners motiveer, wat op hul beurt weer die area skoon sal agterlaat en nie die bates soos betontafels, stoele en braaiers beskadig nie.

Die munisipaliteit se parke-afdeling onder leiding van Dalene Lampbrecht doen uitstekende werk om die dorp se openbare areas netjies te hou. Die departement kan egter nie voorbly met die vervanging van gevandaliseerde eiendom, veral rondom Kees Taljaard Stadion, nie.