Deon Cornelius sê dat hulle kontak gemaak het met ’n vlieënier in Pretoria wat hulle net brandstofgeld vra om goedere Richardsbaai toe te karwei.

Hy sê hulle het op Richardsbaai besluit omdat hulle ’n veilige landingstrook kon identifiseer en mense daar ken wat hulle vertrou om die goedere weer by gesinne in nood uit te kry. Sy vrou Susan Cornelius se suster, Tina Visser, bly daar.

Volgens mnr. Cornelius het hy na vriende en kennise uitgereik en skenkings van Koeweit en Amerika sowel as van plaaslike mense soos DCM Line Bording en Kanonop Spar ontvang.

Hulle kan net 250 kg per slag af vlieg en die eerste vlug is reeds vol. Dit vertrek vandag 12:00 na Richardsbaai. Hulle beplan nog vlugte soos wat kos en brandstofgeld vir die vliegtuig beskikbaar word.

Me. Cornelius sê dat die besending van ’n landingstrook in Richardsbaai deur haar suster en ’n skoolvriend, Tinus Derksen, na behoeftiges in die provinsie versprei sal word.

“Dit is vreeslik wat daar aangaan. My sussie vertel dat sy R95 vir ’n bruinbrood moes betaal,” sê me. Cornelius.

• Daar gaan ’n trollie by Kanonop Spar staan waar inwoners kan help met skenkings. Daar word veral babakos, babamelk en sanitêre ware vir vroue gevra. Vir meer inligting kan daar met mnr. Cornelius direk geskakel word by 061 588 3714.