Covid eis raakvat takbestuurder van Buco
Die raakvat takbestuurder van Buco, mnr. Hennie Lottering (41), het gister (Woensdag) weens Covid-19 komplikasies in die intensiewe eenheid van die Life Midmed Hosptiaal gesterf.
Mnr. Lottering se vrou, Lize, het haar man beskryf as “die wonderlikste mens, ’n great pa en ’n fantastiese man. Hy het uitgeleef hoe lief hy vir sy familie was.”
Die egpaar was 14 jaar getroud en 20 jaar saam. “Hy was vir 20 jaar die beste deel van my lewe.”
Sy onthou hoe hy as jong man, 21 jaar gelede, begin het by Builders Market en hulle later oor is na Buco. Hy was die afgelope 10 jaar die takbestuurder by Buco op Middelburg. Mnr. Lottering was net so geliefd by sy kollegas en kliënte. “Hy het ’n punt daarvan gemaak om mense te laat glimlag. Daar is so baie mense, letterlik honderde, wat lief was vir hom.”
Van die personeel by Buco het vanoggend gesê dat “Hennie ’n goeie man was. Hy was ’n yster!” Mnr. Lottering word oorleef deur sy vrou, Lize en kinders Ryan en Lee-Ann. •Me. Lottering is tans besig om begrafnisreëlings te tref. Sodra dit gefinaliseer is, sal www.mobserver.co.za dit bekend maak.
