Edmund Venter (Noordroep Radiogroep Sektor 3) sê daar is besluit om pro-aktief op te tree en ’n gesamentlike patrollie te reël, nadat daar sedert Maandag verskeie misdaadvoorvalle was.

Daar het talle noodroepe ingekom van mense in Oos- en Beyers Naudéstraat dat verdagtes in hul erwe was en is daar ook ’n fiets gesteel.

Die Noodroep Radiogroep Sektor 3 het wel ’n verdagte vasgetrek na die voorvalle, maar is deur die polisie laat gaan weens ’n gebrek aan bewyse.

Nadat daar ook klagtes van misdaad in Mineralia gekom het, is besluit om ’n blitsige optrede te hou.

Titon Security Services en Hi-SQ Security het deel van die patrollie uitgemaak, wat om 20:00 by OK Grocer in Jeppestraat weggespring het.

Die lede het tot na middernag deur die strate beweeg.

Volgens Edmund was daar in hierdie tyd geen misdaadverwante voorvalle in hierdie twee uitbreidings nie. Hulle moes egter verskeie mense waarsku wat na die grendeltyd van 21:00 nog in die strate rondgery het.