Die oomblik toe die nuus van haar afsterwe bekend geword het, het Erika du Preez ’n blommetjie gaan neersit op die plek waar haar kar altyd gestaan het by Compu Truck.

Daarna het honderde blomme gevolg en gisteraand is kerslanterns die lug in gestuur op dieselfde plek in herinnering aan dié formidabele vrou.

Haar dogter, Jules, vertel die gebaar van een vrou, het later verander in ’n hele blommeparadys in die parkeerarea.

“Ek het vir mense op Facebook gesê as hulle nie blomme kan kom neersit nie, kan hulle iets in oranje, wat haar gunsteling kleur was, op Facebook sit. Daar het letterlik honderde boodskappe met blomme in oranje gevolg.”

Me. Franzoso was 19 dae in die Life Midmed Hospitaal, waarvan 17 dae in die intensiewe eenheid. “My ma het so hard teen die siekte geveg.” Sy is vir die Covid-19 virus behandel.

Kort voor haar afsterwe het haar seun, Cois, by haar ingegaan en by sy ma gebly tot sy oorlede is.

Beide haar kinders het haar beskryf as “’n merkwaardige mens, wat passievol lief was vir mense en diere. Sy het ’n hart van omgee gehad.”

Hulle onthou hoe sy almal altyd wou help. “As iemand gestruikel het, was sy daar om te help.”

Me. Franzoso het op 12 Julie haar 55ste verjaardag in die hospitaal gevier.

Sy word oorleef deur haar man, Bruno, kinders Cois, Jules, Giovanni en Sonnika, skoonkinders, sewe kleinkinders, haar ma, Delene en drie broers.

Die familie is nog besig om begrafnisreëlings te tref.

*Jules het gemeld dat haar besigheid, ‘Fiesta in a Box’ begin het om liefdespakkies vir die hospitaalpersoneel op te maak. Hulle het reeds vir een van die sale pakkies gegee en sal hulle elke week hierna vir die ander sale ook skenk.