Die ongeluk het Saterdagoggend tussen 11:00 en 12:00 in Joubertstraat plaasgevind, toe Carel, sy driejarige boetie Charlo en hulle ma, Charmaine, op pad terug was na hulle oupa se huis vanaf OK Grocer.

Carel se pa, Carel snr, vertel dat sy vrou en twee seuns op die sypaadjie was naby die huis, toe die bakkie van Meyerstraat se rigting afgejaag het. Charmaine kon hoor hoe die wiele skree toe hy van die stopstraat af wegtrek en toe beheer verloor het, voordat hy Carel jnr raakgery het.

Carel is deur die lug geslinger.

Hy is nerf af, gekneus en nog baie deurmekaar na die voorval, maar het gelukkig nie breuke opgedoen nie, en is die selfde dag ontslaan. Hoewel sy gesin dankbaar is dat hy leef, is hulle hewig ontsteld dat die bestuurder nooit op die toneel gearresteer is nie.

Volgens Carel snr het die bestuurder die toneel verlaat, en nadat hy terug gebring is deur die eienaar van die bakkie, kon hy nooit ’n rybewys toon nie.

“Dis as gevolg van roekeloosheid dat mense op sypaadjies beseer word. My kind kon dood gewees het,” het Carel vertel.

“Ek was by die werk toe ek die oproep kry, en ek kan nie beskryf wat deur mens kop gaan nie. Ek het huistoe gejaag en gewonder wat wag op my.”

Hy vertel dat Charlo steeds bly praat oor “die bakkie”.

“Charmaine sê dat dit net ’n wonderwerk is dat Charlo nie ook getref is nie, die bakkie het hom met millimeters gemis.”

•Die Minnaar gesin het ’n saak gemaak by die Middelburg SAPD. Navraag oor die ondersoek is ingedien, maar geen kommentaar is ontvang teen druktyd nie.