Mnr. Louw Rootman, een van die boere op die Keerom plotte, sê dit is vir hom belangrik om elke persoon wat Sondag gehelp het, te bedank.

“Was dit nie vir julle almal se hulp nie, sou daar beslis huise afgebrand het en diere beseer of gedood gewees het.”

Mnr. Johann Hattingh (ook van die Keerom plotte) sê mnr. Odendaal het hom omstreeks 06:00 gebel en gesê hy sien ’n rokie trek in die koppie van die munisipale gronde. Mnr. Hattingh het uitgekyk na buite, die rook gesien en dadelik die brandweer gebel. Kort na 10:00 het die vlamme oor die pad gespring en ontaard in ’n wegholbrand.

Beide mnr. Hattingh en mnr. Rootman sê vanaf die oomblik wat die boodskap uitgestuur is vir boere om te kom help, het daar van oral af hulp opgedaag.

“Daar was 10 Land Cruisers en talle ander bakkies met boere wat met hul vuurspuite, vuurblasers en plakke opgedaag het,” sê mnr. Rootman.

Mnr. Hattingh meld dat hy en mnr. Odendaal ook die brandweer gehelp het, toe die brandweervoertuig sonder water was. Omstreeks 15:30 is die vuur geblus en kon almal eers huiswaarts keer. Mnr. Hattingh raam dat daar sowat 35ha veld (munisipale grond en plotte) in die brand verwoes is.

“Ons is egter dankbaar dat niemand beseer is nie.”