Video en foto’s: Lofkleuters groet Amé met balonne en blomme in gietende reën
Dit was asof moeder aarde saam getreur het, toe familie en maatjies van Amé Janse van Rensburg (5) van haar afskeid geneem het, in gietende reën, tydens ’n seremonie by Lofkleuters.
Amé is Sondag in ’n ongeluk op die R555 (Ou Witbankpad) oorlede.
Haar maats en juffrouens by Lofkleuters het met blomme en balonne ’n laaste eerbetoon aan die merkwaardige jong dogtertjie gegee. Klein Amé se ouers, boetie, groot ouers, oumagrootjie en peetouers het die seremonie bygewoon.
Op ’n tafel, wat gekreun het onder die blomme, het ’n groot foto van Amé en ’n brandende kers gestaan.
Haar ouma, Edith Badenhorst, het met haar aankoms rooi bottelborselboom-blomme oor die tafel gestrooi en gesê dat sy van kleins af vreeslik lief was daarvoor.
Trane is hier en daar deur ’n glimlag onderbreek as ’n juffrou iets van Amé onthou het, soos toe sy op die fietsie-baan, vasgevang in haar eie wêreld, kliphard ‘Let it go’ van Frozen gestaan en gesing het.
Terwyl balonne losgelaat is, het Amé se maatjies sag ‘Baai!’ agterna geroep en met klein handjies agter die balonne aan gewaai.
