Nicholas van der Merwe is op 18 September in Gqerberha (Port Elizabeth) gearresteer nadat ’n privaat speurder en die polisie hande gevat en ’n grootskaalse soektog na hom geloods het.

Van der Merwe het verlede Donderdag in die hof skuld erken op 13 aanklagte. Hy sal in November gevonnis word.

Johan Botes, ’n privaat speurder uit Potchefstroom, het aan www.mobserver.co.za gesê dat hy reeds 25 vroue se verklarings afgeneem het. Hy was op pad na Middelburg om nog drie eiendomsagente hier se verklarings te kom neem. Daar is ook vermoedelik in Natal slagoffers wat nog nie opgespoor is nie. ’n Middelburgse eiendomsagent, wat versoek het dat haar naam weerhou word, het aan www.mobserver.co.za gesê, dat sy aan die begin van die jaar een oggend wakker geword het en gesien het dat sy ’n WhatsApp video-oproep gemis het.

“Dit is glad nie vreemd nie, want mense bel jou op die onmoontlikste tye, omdat jou nommer so wyd geadverteer word.”

Sy sê dat sy in die haarsalon was toe die man weer gebel het. Sy kon nie haar oë glo nie.

“Al wat ek onthou is hoe grillerig en smerig hy voorgekom het, asof hy lanklaas gebad het. Hy was sweterig en sy vingernaels was vuil,” vertel een van sy slagoffers.

Mnr. Botes kan op 082 227 9823 gekontak word indien daar nog persone met inligting oor die saak is.