Die boer, wat versoek het om anoniem te bly, het dadelik navraag by die Emakhazeni Munisipaliteit in Belfast gedoen, omdat daar glad nie toestemming gevra is om die 250 000 liter tenk op sy plaas op te sit nie.

Hy sê dat die woning waar hulle die tenk wou opsit slegs oor ’n boorgat met ’n handpomp beskik, wat skaars ’n 100 liter ’n uur kan pomp.

Die watertenks word gewoonlik by woonbuurte opgesit. Daar was reeds ’n reuse konkruitblad gegooi met industriële boute waar die watertenk opgesit moes word.

Munisipale verteenwoordigers het onderneem om Donderdagoggend by hom te wees vir ’n vergadering om die watertenk te bespreek.

Die boer is vanoggend in kennis gestel dat die vergadering nie meer gaan plaasvind nie en dat die tenk verkeerdelik by hom opgedaag het. Dit gaan glo nou in Dullstroom staangemaak word.

Toe die boer hulle uitvra oor die duisende rande se sement en staal wat reeds gebruik is, het hulle gesê dat hulle die yster wat bo die grond uitsteek gaan afsny en die sement met grond bedek.