Met tot 156mm reën wat die afgelope week in en om Middelburg geval het, het ons dam ook baie water gekry.

Verlede Woensdag het die vlak op 77.79% gestaan, gister was hy al op 87.35% en vanoggend het hy gestyg tot op 91.94%.

Damopsigter David Nonyana sê die kompensasieklep is reeds oop op 15% en sal hulle die inloop fyn dophou.

Die kompensasieklep sal groter oopgemaak word, sou dit nodig wees en eers as die klep nie meer die inloop kan hanteer nie, sal gekyk word om die sluise oop te maak.

Die weervoorspelling het egter nog baie reën voorspel en glo almal dat ten minste een sluis oor die naweek oopgemaak sal word.