Op ’n video kan ’n mens sien hoe breed die stroom in ’n rivier verander het.

Me. Henriëtte Pieterse sê die storm het omstreeks 11:00 uitgebreek en het die massiewe rivier water om ongeveer 11:47 deur die Anford Gasteplaas (sowat 13km anderkant Belfast op die Machadodorppad) gedruis.

Tydens die storm het die water vanaf die fontein en klein spruitjie oorkant die N4, wat gewoonlik onderdeur die N4 loop, dwars oor die N4 gespoel en deurgestroom na Rolling Hills.

In die proses is sowat 250m van die heining tussen Rolling Hills en Anford saamgesleep (Dit staan algemeen in die omgewing bekend as die “drie dammetjies” se area.)

Die massas water het deur die damme en oor die waterval op die plaas gespoel en die laaste dam se wal op Anford gebreek. In hierdie selfde tyd is die pad anderkant Dalmanutha toegemaak, omdat ’n breë stroom water oor die pad gespoel het.

Weens die reën het die grondpaaie in ’n nagmerrie ontaard en het talle voertuie op die Winnaarspoortpad vasgeval.

Me. Pieterse het gemeld dat dit tans ’n groot uitdaging is om met ’n voertuig te ry in hierdie hele area, aangesien daar ook padwerke is op die N4 met ’n klipbrekery, waar klip vir die pad uitgehaal en fyngemaak word.

•By die nabye Milly ‘s het die water ook amok gemaak en was die grondvloere van die chalets op die plaas heeltemal oorstroom. Na die storm het net die boonste gedeelte van ’n paar van die chalets uitgesteek.