Mnr. Stef Jansen van Vuuren het oor die naweek laat weet dat die eienaar van die kragopwekker, wat hy in ’n gesteelde wiele-asdrom gekry het, is opgespoor.

Hy het verlede week ’n man gekonfronteer wat vroegoggend in Colleystraat (Dennesig) met ’n wiele-asdrom in die straat op gestap het, waarop die dief omgespring en gevlug het.

In die asdrom was daar ’n kragopwekker en mnr. Jansen van Vuuren het besef dat dit ook gesteel is.

Lees ook: Dief hol weg toe hy met wiele-asdrom en kragopwekker betrap word

Die asdrom is in Olienhoutstraat (Kanonkop) gesteel.

Nadat die berig op www.mobserver.co.za verskyn het, het ’n ander inwoner van Olienhoutstraat hom gekontak en gesê dat sy kragopwekker gesteel is.

“Hy het die kragopwekker baie mooi beskryf. Selfs gesê dat ek die boonste gedeelte moet afhaal, want daar het ’n part binne gebreek wat hy geplak het. Ek het binne gekyk en alles was presies soos hy gesê het.”

•Mnr. Jansen van Vuuren was al verskeie kere by Olienhoutstraat 25, waar die asdrom gesteel is, maar kon hulle nie die eienaars in die hande kry nie.