Van Vuuren staan tereg op die moord van sy meisie, Andrea Venter.

Sy regsverteenwoordiger, adv. Innocent Mthembu, het Vrydag kort voor die moordverhoor in die hooggeregshof in Johannesburg sou begin, aangedui dat Jansen van Vuuren voortaan ’n privaat regsverteenwoordiger van Middelburg gaan gebruik.

Mnr. Kruger het Vrydag gekonsulteer met Jansen van Vuuren saam met nog ’n prokureur, mnr. Francois Joubert.

Mnr. Joubert het hooggeregshof bevoegdhede. Mnr. Kruger het vir mnr. Joubert instruksie gegee om die verskynings te behartig.

•Andrea is in 2011 voor haar woonstelkompleks in Johannesburg met ’n mes doodgesteek. Jansen van Vuuren het probeer selfmoord pleeg, maar dit het misluk en hy is in hegtenis geneem.

Vier dae voor die verhoor in Mei 2013 sou begin, het Jansen van Vuuren met vervalsde reisdokumente landuit gevlug.

Dieselfde jaar is hy in hegtenis geneem deur die Brasiliaanse owerhede vir vervalsde dokumente en het bykans twee jaar tronkstraf in Rio de Janeiro uitgedien. In Junie 2020 is hy weer opgespoor en in Rio de Janeiro gearresteer en aangehou.

Interpol het hom in Oktober 2020 vanaf Brasilië na OR Tambo lughawe vergesel.

Nuusmedia het hulle op die lughawe ingewag waar Jansen van Vuuren in ’n vangwa gelaai is.

•Jansen van Vuuren het verlede week weer in die hooggeregshof verskyn en die saak is uitgestel omdat hy aangedui het dat hy ’n nuwe regspan het. Alle aanduidings is dat die saak vandag weer uitgestel sal word vir verdere konsultasie met sy regspan.