In ’n amptelike brief aan ouers skryf skoolhoof Pieter Fouché dat die skool vandag, Woensdag 2 Februarie, om 13:30 sluit en weer volgende Dinsdag, 8 Februarie, sal open.

Dit nadat Covid-19 positiewe gevalle by die skool “onrusbarend” gestyg het.

Lees ook: HTS Middelburg sluit weens Covid-19 uitbraak onder leerlinge

Daar is tans agt onderwysers wat Covid-19 positief is en drie klasse wat isoleer. Daar is ook op Dinsdag, 1 Februarie, 30 siek kinders, vir verskeie kwale, huistoe gestuur en vandag, voor eerste pouse, het 10 kinders reeds siek gevoel.

Mnr. Fouché het gesê dat daar geen rede tot paniek is nie en dat hulle slegs voorkomend optree nadat hulle advies van die Departement van Gesondheid, asook die Departement van Onderwys, ontvang het en in gesprek met die skool se beheerliggaam was.

Lees ook: Nog ’n skool sluit weens virus

Die Hoër Tegniese Skool Middelburg het verlede week aangekondig dat hulle vir ’n week toemaak. Die skool het hierdie week weer sy deure geopen.

Kort daarna het Kleuterskool Gansiekeur aangekondig dat hulle die helfde van die skool sluit en slegs die babaklasse, wat nie in kontak is met die groter kinders nie, sal oophou. Hulle maak die groter klasse weer komende Maandag oop.

Hoërskool Middelburg is ook tans gesluit en maak weer Maandag oop.

•Hoërskool Ben Viljoen in Groblersdal is ook tans gesluit weens Covid-19.