Sy vrou, Maureen, sê hy is verlede jaar met kanker gediagnoseer. Sowat twee weke gelede het hy skielik baie swak geword en het sy hom in die Life Midmed Hospitaal laat opneem.

Die meeste inwoners het oom Jannie persoonlik geken, weens sy vriendelike, saggeaarde geaardheid.

Hy het in 1995 Janmy Dienste, die vulstasie in Samora Machelstraat, begin. As hy by die vulstasie was, het hy graag met kliënte gesels en ’n grappie vertel.

“He was the kindest, kindest man ever! Jannie was so lief vir sy kleinkinders,” sê tannie Maureen.

Die egpaar was 40 jaar getroud.

Oom Jannie word oorleef deur tannie Maureen, vyf seuns, skoondogters en kleinkinders.

Me. Myburgh sê hulle is nog besig met reëlings vir die roudiens, maar alle aanduidings is dat dit volgende Woensdag (9 Februarie), om 11:00, uit die Lighuis gemeente gehou sal word.

Haar een seun van Amerika is hier om saam met die res van die familie sy ma te ondersteun. Die ander seuns van Australië en Nieu Seeland sal egter nie die diens kan bywoon nie en sal dit virtueel volg.

Die skakel sal op www.mobserver.co.za geplaas word, sodra die familie dit ontvang.