Die vrou (wat verkies om anoniem te bly) het beweer dat sy “die ware inligting het rakende die saak van die jongman wat gearresteer is in verband met die skrootstaal.”

Sy het gesê die man is 26 jaar oud en die voertuig waarmee hy gery het nie vervalsde nommerplate op gehad het nie, maar dat die voertuig nog op die handelaar se naam is.

“Hulle het nie staal van die masjiene af gesteel nie. Die staal was in twee Skippy’s wat op die leë erf langs die werkswinkel gestaan het.” ’n Skippy is ’n groot industriële asblik.

Lees ook: Koeëlvaste baadjie en dwelms gekry na jaagtog

“Die 18-jarige mannetjie is die een wat vir die jongman vertel het waar dit was en hy het hom gevra om hom soontoe te vat.

”Na aanleiding van die koeëlvaste baadjie wat tydens ’n vorige geleentheid in sy voertuig gekry is, het sy gemeld dat dit “’n oud-SAP (polisie) uitreiking was, wat opgetel was in die veld. Ek het dit persoonlik gerapporteer en daar is gesê dat dit ou toerusting is en dat ons dit maar kan verbrand.”

Sy het dit ook duidelik gestel dat hy nie weg gejaag het nie, maar na ’n kompleks gery het om sy vriendin daar af te laai by haar ma.

•Cornelius Petrus Jacobus de Vaal het gister in die hof verskyn. ’n Diefstalklagte word ondersoek. Borg van R300 is toegestaan en is die saak uitgestel na later hierdie maand vir verdere ondersoek.